শ্রীনৃসিংহসরস্বতিস্তোত্রম্

Shri Nrisimhasarasvati Stotram
শ্রীনৃসিংহসরস্বতিস্তোত্রম্

 

(শার্দূলবিক্রীডিতবৃত্তম্)
সর্বপ্রাণিশুভাত্মকং শ্রুতিনুতং দিব্যং পদং পাবনং
অজ্ঞানান্ধদৃগার্তমূঢজনতাভাস্বৎপ্রদীপাননম্ ।
ভক্তানন্তশুভেপ্সিতার্থফলদং রারাজমানং গুরুং
ভূমানন্দচিদম্বুধিং যতিবরং বন্দে নৃসিংহং শিবম্ ॥ ১॥

ব্রহ্মাবিষ্ণুমহেশরূপমমলং শ্রীদত্তনামাঙ্কিতং
সর্বপ্রাণিবিজীবনং নিরবধিং সর্বান্তরজ্যোতিষম্ ।
স্মৃত্যাদিশ্রুতিয়ুক্তিভিঃ পরিচিতং স্বানন্দসূর্যং গুরুং
ভূমানন্দচিদম্বুধিং যতিবরং বন্দে নৃসিংহং শিবম্ ॥ ২॥

সংসারাম্বুধিমজ্জনার্দিতনরত্রাণক্রিয়াতৎপরং
মায়ৌদ্ধত্যবিলাপকামৃতগিরং সর্বজ্ঞমীশং গুরুম্ ।
মায়াসৃষ্টিবিকারশূন্যমমলং ব্রহ্মাভয়ং শাশ্বতং
ভূমানন্দচিদম্বুধিং যতিবরং বন্দে নৃসিংহং শিবম্ ॥ ৩॥

নানাচিত্রচরিত্রদিব্যকুসুমামোদান্ন্বিতাঙ্গপ্রভুং
নানাভক্তগণালিসেবিতপদদ্বন্দ্বাম্বুজং নির্মলম্ ।
সর্বপ্রাণিগুহাশয়ং নিরবধিং ভক্তাব্ধিচন্দ্রং গুরুং
ভূমানন্দচিদম্বুধিং যতিবরং বন্দে নৃসিংহং শিবম্ ॥ ৪॥

মোক্ষানন্দসুধামৃতামরবপুঃ সংন্যাসিভিঃ সংস্তুতং
বোধপ্রাণমুনিন্দ্রসেবিতপদং দত্তাভয়ং পাবনম্ ।
কাষায়াম্বরদণ্ডমণ্ডিততনুং বেদান্তবেদ্যং গুরুং
ভূমানন্দচিদম্বুধিং যতিবরং বন্দে নৃসিংহং শিবম্ ॥ ৫॥

ইতি শ্রীসমর্থ রামদাসানুগৃহীত রামপদকঞ্জভৃঙ্গায়মান
শ্রীমৎপরমহংস পরিব্রাজকাচার্য সদ্গুরু ভগবতা
শ্রী শ্রীধরস্বামিনা বিরচিতং শ্রীনৃসিংহসরস্বতিস্তোত্রং সম্পূর্ণম্ ।
(রচনাকাল – দীপাবলী ১৮৬৭,
রচনাস্থল – নরসোবাচী বাডী,
শ্রীধরসন্দেশঃ কার্তিক ১৮৮৮)