॥ শ্রীশনিরক্ষাস্তবঃ ॥
॥ পূর্বপীঠিকা ॥
শ্রীনারদ উবাচ ।
ধ্যাত্বা গণপতিং রাজা ধর্মরাজো য়ুধিষ্ঠিরঃ ।
ধীরঃ শনৈশ্চরস্যেমং চকার স্তবমুত্তমম্ ॥
॥ মূলপাঠঃ ॥
॥ বিনিয়োগঃ ॥
ওঁ অস্য শ্রীশনিস্তবরাজস্য সিন্ধুদ্বীপ ঋষিঃ । গায়ত্রী ছন্দঃ ।
শ্রীশনৈশ্চর দেবতা । শ্রীশনৈশ্চরপ্রীত্যর্থে পাঠে বিনিয়োগঃ ॥
॥ ঋষ্যাদিন্যাসঃ ॥
শিরসি সিন্ধুদ্বীপর্ষয়ে নমঃ । মুখে গায়ত্রীছন্দসে নমঃ ।
হৃদি শ্রীশনৈশ্চরদেবতায়ৈ নমঃ ।
সর্বাঙ্গে শ্রীশনৈশ্চরপ্রীত্যর্থে বিনিয়োগায় নমঃ ॥
॥ স্তবঃ ॥
শিরো মে ভাস্করিঃ পাতু ভালং ছায়াসুতোঽবতু ।
কোটরাক্ষো দৃশৌ পাতু শিখিকণ্ঠনিভঃ শ্রুতী ॥
ঘ্রাণং মে ভীষণঃ পাতু মুখং বলিমুখোঽবতু ।
স্কন্ধৌ সংবর্তকঃ পাতু ভুজো মে ভয়দোঽবতু ॥
সৌরির্মে হৃদয়ং পাতু নাভিং শনৈশ্চরোঽবতু ।
গ্রহরাজঃ কটিং পাতু সর্বতো রবিনন্দনঃ ॥
পাদৌ মন্দগতিঃ পাতু কৃষ্ণঃ পাত্বখিলং বপুঃ ॥
॥ ফলশ্রুতিঃ ॥
রক্ষামেতাং পঠেন্নিত্যং সৌরের্নামাবলৈর্যুতম্ ।
সুখী পুত্রী চিরায়ুশ্চ স ভবেন্নাত্র সংশয়ঃ ॥
॥ ইতি শ্রীশনিরক্ষাস্তবঃ ॥
….