গঙ্গাস্তুতী গঙ্গাদশহরাস্তোত্রম্ চ
শ্রীগণেশায় নমঃ ॥
ব্রহ্মোবাচ --
নমঃ শিবায়ৈ গঙ্গায়ৈ শিবদায়ৈ নমো নমঃ ।
নমস্তে রুদ্ররূপিণ্যৈ শাঙ্কর্যৈ তে নমো নমঃ ॥ ১॥
নমস্তে বিশ্বরূপিণ্যৈ ব্রহ্মামূর্ত্যৈ নমো নমঃ ।
সর্বদেবস্বরূপিণ্যৈ নমো ভেষজমূর্তয়ে ॥ ২॥
সর্বস্য সর্বব্যাধীনাং ভিষক্ষ্রেষ্ঠ্যৈ নমোঽস্তু তে ।
স্থাণুজঙ্গমসম্ভূতবিষহন্ত্র্যৈ নমো নমঃ ॥ ৩॥
ভোগোপভোগদায়িন্যৈ ভোগবত্যৈ নমো নমঃ ।
মন্দাকিন্যৈ নমস্তেঽস্তু স্বর্গদায়ৈ নমো নমঃ ॥ ৪॥
নমস্ত্রৈলোক্যভূষায়ৈ জগদ্ধাত্র্যৈ নমো নমঃ ।
নমস্ত্রিশুক্লসংস্থায়ৈ তেজোবত্যৈ নমো নমঃ ॥ ৫॥
নন্দায়ৈ লিঙ্গধারিণ্যৈ নারায়ণ্যৈ নমো নমঃ ।
নমস্তে বিশ্বমুখ্যায়ৈ রেবত্যৈ তে নমো নমঃ ॥ ৬॥
বৃহত্যৈ তে নমস্তেঽস্তু লোকধাত্র্যৈ নমো নমঃ ।
নমস্তে বিশ্বমিত্রায়ৈ নন্দিন্যৈ তে নমো নমঃ ॥ ৭॥
পৃথ্ব্যৈ শিবামৃতায়ৈ চ সুবৃষায়ৈ নমো নমঃ ।
শান্তায়ৈ চ বরিষ্ঠায়ৈ বরদায়ৈ নমো নমঃ ॥ ৮॥
উস্রায়ৈ সুখদোগ্ধ্র্যৈ চ সঞ্জীবিন্যৈ নমো নমঃ ।
ব্রহ্মিষ্ঠায়ৈ ব্রহ্মদায়ৈ দুরিতঘ্ন্যৈ নমো নমঃ ।
প্রণতার্তিপ্রভঞ্জিন্যৈ জগন্মাত্রে নমোঽস্তু তে ॥ ৯॥
সর্বাপত্প্রতিপক্ষায়ৈ মঙ্গলায়ৈ নমো নমঃ ॥ ১০॥
শরণাগতদীনার্তপরিত্রাণপরায়ণে ।
সর্বস্যার্তিহরে দেবি নারায়ণি নমোঽস্তুতে ॥ ১১॥
নির্লেপায়ৈ দুর্গহন্ত্র্যৈ দক্ষায়ৈ তে নমো নমঃ ।
পরাত্পরতরে তুভ্যং নমস্তে মোক্ষদে সদা ॥ ১২॥
গঙ্গে মমাগ্রতো ভূয়া গঙ্গে মে দেবি পৃষ্ঠতঃ ।
গঙ্গে মে পার্শ্বয়োরেহি ত্বয়ি গঙ্গেঽস্তু মে স্থিতিঃ ॥ ১৩॥
আদৌ ত্বমন্তে মধ্যে চ সর্বং ত্বং গাং গতে শিবে ।
ত্বমেব মূলপ্রকৃতিস্ত্বং হি নারায়ণঃ পরঃ ॥ ১৪॥
গঙ্গে ত্বং পরমাত্মা চ শিবস্তুভ্যং নমঃ শিবে ।
য় ইদং পঠতি স্তোত্রং ভক্ত্যা নিত্যং নরোঽপি য়ঃ ॥ ১৫॥
শৃণুয়াচ্ছ্রদ্ধয়া য়ুক্তঃ কায়বাক্চিত্তসম্ভবৈঃ ।
দশধাসংস্থিতৈর্দোষৈঃ সর্বৈরেব প্রমুচ্যতে ॥ ১৬॥
সর্বান্কামানবাপ্নোতি প্রেত্য ব্রহ্মণি লিয়তে ।
জ্যেষ্ঠে মাসি সিতে পক্ষে দশমী হস্তসংয়ুতা ॥ ১৭॥
তস্যাং দশম্যামেতচ্চ স্তোত্রং গঙ্গাজলে স্থিতঃ ।
য়ঃ পঠেদ্দশকৃত্বস্তু দরিদ্রো বাপি চাক্ষমঃ ॥ ১৮॥
সোঽপি তত্ফলমাপ্নোতি গঙ্গাং সম্পূজ্য য়ত্নতঃ ।
অদত্তানামুপাদানং হিংসা চৈবাবিধানতঃ ॥ ১৯॥
পরদারোপসেবা চ কায়িকং ত্রিবিধং স্মৃতম্ ।
পারুষ্যমনৃতং চৈব পৈশুন্যং চাপি সর্বশঃ ॥ ২০॥
অসম্বদ্ধপ্রলাপশ্চ বাঙ্ময়ং স্যাচ্চতুর্বিধম্ ।
পরদ্রব্যেষ্বভিধ্যানং মনসানিষ্টচিন্তনম্ ॥ ২১॥
বিতথাভিনিবেশশ্চ মানসং ত্রিবিধং স্মৃতম্ ।
এতানি দশ পাপানি হর ত্বং মম জাহ্নবি ॥ ২২॥
দশপাপহরা য়স্মাত্তস্মাদ্দশহরা স্মৃতা ।
ত্রয়স্ত্রিংশচ্ছতং পূর্বান্ পিতৄনথ পিতামহান্ ॥ ২৩॥
উদ্ধরত্যেব সংসারান্মন্ত্রেণানেন পূজিতা ॥ ২৪॥
নমো ভগবত্যৈ দশপাপহরায়ৈ গঙ্গায়ৈ নারায়ণ্যৈ রেবত্যৈ ।
শিবায়ৈ দক্ষায়ৈ অমৃতায়ৈ বিশ্বরূপিণ্যৈ নন্দিন্যৈ তে নমো নমঃ ॥ ২৫॥
সিতমকরনিষণ্ণাং শুভ্রবর্ণাং ত্রিনেত্রাং
করধৃতকলশোদ্যত্সোত্পলামত্যভীষ্টাম্ ।
বিধিহরিহররূপাং সেন্দুকোটীরজুষ্টাং
কলিতসিতদুকূলাং জাহ্নবীং তাং নমামি ॥ ২৬॥
আদাবাদিপিতামহস্য নিগমব্যাপারপাত্রে জলং
পশ্চাত্পন্নগশায়িনো ভগবতঃ পাদোদকং পাবনম্ ।
ভূয়ঃ শম্ভুজটাবিভূষণমণির্জহ্নোর্মহর্ষেরিয়ং
কন্যা কল্মষনাশিনী ভগবতী ভাগীরথী দৃশ্যতে ॥ ২৭॥
গঙ্গা গঙ্গেতি য়ো ব্রূয়াদ্যোজনানাং শতৈরপি ।
মুচ্যতে সর্বপাপেভ্যো বিষ্ণুলোকং স গচ্ছতি ॥ ২৮॥
ইতি স্কন্দে মহাপুরাণে একাশীতি সাহস্র্যাং সংহিতায়াং তৃতীয়ে কাশীখণ্ডে
ধর্মাব্ধিস্থা গঙ্গাস্তুতিঃ অথবা শ্রীগঞ্গাদশহরাস্তোত্রং সম্পূর্ণম্ ।
